पुनः मर्मत गरेपछि खिदिमामा बल्यो बत्ति

१३ वैशाख (खिदिमा)-बेला बेलामा आईलाग्ने विपत्तीबाट हैरान छन् खिदिमाबासी । कहिले भलबाढी त कहिले चट्याङको सामना गर्दै विजुली बालिरहेका खिदिमाबासीहरु पुनः उज्ज्यालोमा बस्न पाएका छन् ।

केही समयअघि चट्याङले क्षति गरेको विधुतीय उपकरणहरु फेरिएपछी खिदिमामा अहिले विजुली वत्ती वलेको छ । साकेला गाउँपालिका–३ खिदिमा बोपुङमा रहेको तावाखोला तेश्रो लघु जलविधुतको पावर हाउसमा नयाँ विधुतीय उपकरणहरु फेरिएपछि वत्ती वलेको हो । १४ दिनमा वत्ती वलेपछि उपभोक्ताहरुको जनजीवन सामान्य बनेको छ ।

गत वर्षको चैत्र ३० गते पानीसँगै परेको चट्याङले लघु जलविधुतमा रहेको एलसी बोर्ड २ थान, एमसीभी २ थान, लाईटिङ टेष्टर १५ थान, मल्टीप्लग २ थान, टिभी १ थान र डिसहोम सेट १ थान नष्ट गरेको थियो ।

नष्ट भएको सामग्रीहरु मर्मत कोषको १ लाख ५० हजारले खरीद गरी पुन जडान गरिएपछि बिहीबार साँझबाट वत्ती सुचारु भएको बताईएको छ । मर्मत कोषवाट उपकरणहरु खरीद गरी वत्ती सञ्चालन गर्दै आए पनि पटक–पटक चट्याङले दुःख दिने गरेकाले थप सहयोगका लागि गाउँपालिकामा निवेदन दिइएको छ । गाउँपालिकाले सक्दो सहयोग गर्ने आश्वसन दिएको छ ।

वत्ती सुचारु भए पनि चट्याङले ३० घरमा क्षति गरेको छ । चट्याङवाट बच्नलाई लघु जलविधुत आयोजना अन्तरगत विभिन्न स्थानमा गरिएको अर्थिङहरुमा पानी लगाएर चिस्याउने काम सुरु गरिएको छ । उक्त लघु जलविधुतबाट खिदिमा, मात्तिमको माथिल्लो भाग र दिप्रुङ चुईचुम्मा गाउँपालिका–६ छितापोखरी बास्थलाका २ सय ५२ घरधुरी लाभान्वित हुंदै आएका छन् । तीनै स्थानमा केन्द्रिय प्रसारण लाईन नहुंदा लघु जलविधुतमा समस्या आउना साथ अध्याँरोमा बस्नु परेको छ ।