गाउँको हालखबर (कविता)

के बताऊँ तिमीलाई ....।

स्वर्गकी परी तिम्रो गाउँको हालखबर

तिमी शहर पसेकाहरुलाई

मिठो खाने राम्रो लगाउने सपना बोकी

अस्तव्यस्त तिमी शहर पस्दा

तिम्रो गाउँ उजाड मात्र थियो

चामलको भात र नुन खान

बेल्टार र कटारी धाउनु पथ्र्यो

धिपधिपे कुपीमा रात कटाउनु पथ्र्यो

त्यसैले तिमीलाई लाग्ला आज पनि

आफू जन्मिएको गाउँ उस्तै छ भनेर

सपनीमा पनि त्यस्तै देख्छौ होला

तर

आफ्नो मनलाई नढाँटी भन्दा आज

जन्मभूमी गाउँकै याद छ तिमीलाई

आज तिम्रो गाउँ समृद्ध बन्दैछ

जताततै विकासका लहर चल्दैछ

एक दिन लाग्ने बाटो एक घण्टामै पुग्ने भएको छ

धिपधिपे बत्तिको साटो झिलिमिली भएको छ

ति बाँझो बारीहरुमा अलैची र अम्लीसो हल्कीए

बारीका फोक्टाहरुमा फलका राजा किवि

अनि अकवरे खुर्सानी फलेको छ

त्यसैले त तिम्रो उजाड बिर्सिएका गाउँ

स्वर्गकी परी जस्तै बन्दैछ

त्यसैले त आज म लेख्दैछु

तिम्रो गाउँको हालखबर

राम्रो लगाउन मिठो खान

गाउँ छाडी शहर पसेकाहरुलाई

जन्मभूमी तिम्रो गाउँको हालखबर

हो

गाउँको हालखबर]

-अम्बिका राई (दिप्रुङ चुइचुम्मा–६, खिरौंले खोटाङ)